Wirahma Aksara

Wuwung langit nu kasawang jangkung
ngawurkeun langgam hujan, halimpu nyulam puhu kalbu
meulah pikir maksa mieling lumampah diri
Geuning duriat teh lir gundam maca kelir langit
geumpeur ku honcewang ngadegkeun kahayang
ngundeur hariwang di galengan harepan jeung kanyataan
palangsiang boa kabagjaan sajati teh ukur kalangkang sulaya
Langgam angin, hiliwirna melang mapay gigir manah
Kahayang ngan ukur karasa sengitna memeh leupas
lir hate nu wasa wakca ukur ku wirahma aksara
nyambat ngaran panutan, mieling raray jungjunan
Estuning hariring manjang mapay peuting
milang kalangkang nepi raat di tepas balebat
cipruk ku girimis tunggara, inggis di tengah sagara rasa

Nyaan, wuwung langit nu kasawang jangkung
Aya kukupu eunteup ngeukeupan bangbaluh
karasa raheutna, mung eleh ku leubeutna geugeut…

Majalaya-Ciromed, 2009

http://manuskripkesunyian.wordpress.com/category/puisi-sunda/

Dilihat (36) Pengunjung

Lahir di Tasikmalaya, 15 April 1983. Anak ke-4 dari empat bersaudara. Kini tinggal di Cibeber, Cimahi

Tinggalkan Balasan

Alamat email Anda tidak akan dipublikasikan. Ruas yang wajib ditandai *